گیشتر وانگ بوتگیں
پاکستان مُلکے نہ اِنت، دُزانی ٹولی ئے، سندھ ءُ بلوچستان ءِ آجوئیں بستار منگ بہ بنت۔ڈاکٹر بشیر قریشی۔۔
Saturday, March 24, 2012
کراچی: سندھو دیش قومی موومنٹ ءِ رھشون واجہ بشیر قریشی ءَ گُشتگ راجدپتر ءِ ھچ دؤر ءَ پاکستان نامیں ملکے ءِ نام ءُ نشان نہ بیتگ۔ بلے سندھ دُنیا ءِ سیمسرانی تھا یک آجوئیں ملکے ءِ بستار ءَ زانگ بیتگ۔ سندھ زرگور ءِ ھما ملک بیتگ کہ ایشی ءَ قدرت ءَ وڑ وڑیں مال ءُ مڈی ءَ چہ چکار کُتگ۔ سندھ یک ٹوھیں راجدپتر ءُ ربیتی ئے خدا بند اِنت۔ پٹ ءُ پولکاری ءَ چہ دز کپتگیں دمبانی نشاناں چہ پدریں سندھ مرچی ءَ چہ پنچ ھزار سال پیش ھم یک آجوئیں ملکے بیتگ ءُ راجدپتر ءِ تاکاں چہ ھمے نشوندھی رسیت کہ سندھ ءِ تہذیب ھمینکہ کوھن اِنت بابل ، اسیریا ءُ مصر ءِ تہذیب اِنت۔
آئی ءَ گُشتگ پاکستان ءَ پہ زور سندھ گلزمین ءِ سرا قبضہ کُتگ۔ سندھ ءِ تاریخی بستار ھتم کنگ بیتگ ءُ پنجاب ءَ وتگڑیں دو راجی لیکہ ءِ بنیاد ءَ سندھ آوار جتگ۔ پنجابی ءَ ماں سندھ ءَ مذھبی فسات ردوم داتگ ءُ سندھی قومی بنیاداں نزور کنگ ءِ ھاترا مذھب ءِ نام ءِ سرا سیزدہ لکھ ھندو مذھب ءِ منوگریں سندھی چہ سندھ ءَ کَشگ بیتگ اَنت ءُ آھانی ڈولداریں گس ءُ مال ءُ مڈی پچ گرگ بیتگ اَنت ءُ چہ ھندوستان ءَ اَتکگیں پناہ گیریں مھلوک ءَ دیگ بیتگ اَنت۔ 1954 ءَ ون یونٹ ءِ بے پرکیں رھبند دیم ءَ آرگ بیتگ ءُ پہ مدامی سندھی راج ءِ مال ءُ مدیانی سرا پنجابیاں قبضہ کُتگ۔ آئی ءَ گُشتگ پاکستان ءِ وجود گوں سندھیاں ھوار سرجمیں انسانیت ءِ واستہ تاوان بار اِنت۔ پاکستان ءِ پُرشت ءُ پروش ءُ آزادیں سندھ سندھی آں ھوار سرجمیں انسانیت ءِ ھاترا سیت مند اِنت۔ ھما مھلوک کہ چہ ڈن ءَ اَتکگ ءُ سندھ ءَ نشتگ اَنت ، آھانی آیگ ءَ ما تاریخی وئیلے سرپد بئیں، آ بائد آزاد سندھو دیش ءِ جھد ءَ گوں ھوار بہ باں، اگاں نہ آ اے وتگڑیں استان ءِ کجام وڑیں پنڈلاں ھوار بہ باں تہ آ موہ دیگ نہ بنت۔
آئی ءَ گُشتگ عالمی رھبندانی ردا سندھ یک آجوئیں ملکے بیتگ، بلے مذھب ءِ بنیاد ءَ ملکانی جوڑ کنگ ھچ وڑیں عالمی رھبندانی تھا نیست اِنت۔ پاکستان ملکے نہ اِنت، بلکیں مذھب ءِ نام ءِ سرا ادا بازیں راج غلام دارگ بیتگ اَنت۔ سندھ ءُ بلوچستان ءِ آزادیں بستار منگ بہ بنت۔ آئی روس، امریکا، چین، فرانس ءُ دگہ عالمی مھلوک ءَ دزبندی کُتگ کہ آ سندھو دیش ءِ آزادیں بستار ءِ بحال کنگ ءَ سندھ راجی آجوئی ءِ جنز ءِ پلہ مرزی ءَ بہ کن اَنت۔ چیاکہ پاکستان مذھبی ناشرکاری ءِ بنزہ اِنت۔ پاکستان ءِ پرشت ءُ پروش ایشیا ءُ دُنیا سرجمیں ملکانی ھاترا ایمنی ءِ مستاگ اِنت۔ سندھی یک روادار،پُرایمنیں راج ئے۔۔۔۔۔۔۔۔
Comments[ 0 ]
Post a Comment