شھادت راجی جُھدانی بھرے، راجی جِرگہ ءِ شوپچ ءَ کپگ قبضہ گیر ءِ توجیلے۔بی۔این۔ایم
Saturday, February 04, 2012
کوئٹہ: بلوچ نیشنل موومنٹ ءِ جارکش ءَ گوشتگ ماں کراچی ءَ نواب براھمدگ بلوچ ءُ ماں خضدار ءَ شھید مجید ءِ آریپیں پت ءِ پاکی چیریں ایجنسیانی ، دست ءَ شھید کنگ ءَ پد، راجی جِرگہ ءِ شوپچ ءَ کپگ، لھتے وت گڑیں سردار ءُ میرانی راجی جُھد ءَ کاؤنٹر کنگ ءِ توجیلے۔ بی۔ این۔ ایم بس ھمے گپ ءَ گُشگ لوٹیت کہ بلوچ جیڑہ ءِ بُنکی گیش ءُ گیوار بس راجی آجوئی اِنت۔ جرگہ بس دلگوش ءَ چہ راجی جُھد ءِ نیمگ ءَ ترینگ ءُ دگہ نیمگے برگ ءِ سرکاری توجیلے۔ اے مستریں منافقت ایں کہ لھتے مردم یک نیمگے ٹکبندی (قبائلیت) ءَ پہ راج ءَ تاوان گُشنت ءُ دومی نیمگ ءَ راجی جُھد ءَ تاوان بار کنگ ءِ ھاترا جرگہ ءِ شوپچ ءَ کپتگ اَنت۔ بی۔این۔ایم، بی۔آر۔پی ءُ بی۔ایس۔او بلوچستان ءِ آجوئی ءِ ھاترا راجمانی جِد ءُ جھد کنگ ءَ اَنت۔ قُربانی دیگ ءَ اَنت۔ سک ءَ چہ سک تریں جاورانی دیمپانی ءَ کنگ ءَ اَنت۔ دومی نیمگ ءَ قبضہ گیریں استان ءُ آئی ءِ دپ چٹیں ٹکی سردار ءُ میر راستی ءَ چیر دیگ ءَ اَنت ءُ مصالحتی توجیل سازگ ءَ اَنت۔ راجی ءُ سیاسی جیڑہ ءَ مذھبی ءُ قبائلی دروشم دیگ قبضہ گیریں دستانی کوھنیں عادتے، چیاکہ آ واک ءُ اُگدہ ءِ واجہ بیئگ ءَ ابئید ھم تُرس ءِ آماچ اَنت۔ پمیشا آ ٹکبندی ءُ شخصیت پرستی ءِ زندگ کنگ ءِ جُھد ءَ اَنت۔ بی۔این۔ایم ءَ عالمی مھلوک ءَ دزبندی کنان ءَ گُشتگ کہ آ قبضہ گیریں استان ءِ توجیلاں میا اَنت ۔ بلکیں بلوچ راجی جھد ءَ گوں راستی ءِ چماں بہ چار اَنت ءُ آئی ءِ پلہ مرزی ءَ بہ کن اَنت۔
Comments[ 0 ]
Post a Comment