کراچی وئیل ءَ ٹکی جیڑہ ءِ آسر گُشگ ریاست ءِ توجیلے، بی،آر، پی ءَ چار روچ ءِ ہڑتال ءِ جار پِرینتگ
Wednesday, February 01, 2012
بلوچستان: بی۔آر۔پی یے جارکش شیر محمد بگٹی ءَ گُشتگ کہ اے نواب اکبر خان ءُ دگہ راجی شھیدانی قُربانیانی ثمر اِنت کہ نو اے وتگڑیں استان ءِ ھُنڈالاں رمیز وران اِنت ءُ نزور تر اِتگ، کراچی ءِ وئیل اے گپ ءِ پدریں مثالے،، وت ءَ اسلامی جمہوریہ گشوکیں استان نو بلوچ زھگ ءُ زالبولاں ھم شھید کنگ اِنت۔ نواب براھمدگ بگٹی یے گُھار ءُ گھارزتک چیریں ایجنسیاں ماں کراچی ءَ رینجر ءِ چوکی نزیک ءَ پچیں بازار ءَ جتگ ءُ شھید کُتگ اَنت۔ آئی ءَ گُشتگ اے اولی ارش نہ اِنت ۔ نواب براھمدگ ءِ سرا چوشیں بازیں اُرش بیتگ بلے آ رکّ اِتگ۔ نواب براھمدگ ءِ سوئیٹزرلینڈ ءِ روگ ءَ رند اے کار پمیشا کنگ بیتگ دانکہ تُرسے شنگ بہ بیت ءُ نواب براھمدگ چہ راجی آزادی یے جنز ءَ دزکش بہ بیت۔ آئی ءَ ریاستی وتگڑیں رسانکدر ایر جنان ءَ گُشتگ کہ ریاستی میڈیا ءَ اے وئیل ٹکی جیڑہ ءِ درچ ءَ آرگ ءِ جُہد کُتگ، بلے ھمے رسانکدر ءَ ما گُشگ لوٹیں کہ ٹکی جیڑہاں زھگ ءُ زالبول سر گوز کنگ بنت، اے بلوچ روایاتانی تھا نیست کہ زھگ ءُ زالبول جنگ ءُ کُشگ بہ بنت، اے رسانکدر چر اے بلوچ روایتاں ناپوہ اِنت۔ آئی ءَ انسانی حقانی پاسدارانی سرا ایراد گران ءَ گُشتگ کہ عالمی انسانی حقانی گل ءُ زالبولانی حقانی کارگس بلوچ زالبول ءُ زھگانی سرا زُلم ءُ زوراکی ءَ چم وت گنداں بلے آہانی زبان گُشئے مار ءَ وارتگ۔ دومی نیمگ ءَ خُدا ءِ نمائندہ ءُ مسلمان ھم اے بابت ءَ خاموش اَنت۔ آ کُجا اَنت ءُ چیا خاموش اَنت؟ آئی ءَ گُشتگ کہ زھگ ءُ زالبولانی قتل عام ءَ نہ ایوک آزادی پسنداں بلکیں ہر بلوچ ھمے پیغام رستگ کہ ھما کہ استان ءِ پلہ مرزاں آہانی ءُ ہر بلوچ ءِ آسر ھمیش بیت۔ جارکش ءَ گُشتگ مرچی جاور ھمے نشوندھی ءَ دینت کہ ہر راج دوستیں بلوچ یکمُشت بہ بیت۔ ما ریاستی پلہ مرزاں ھم ھمے گپ ءَ گُشگ لوٹیں کہ آ ھرچی بہ کناں ،او بلوچ ءِ رد عمل ایشی ءَ چہ تُرند تر بیت۔ آئی ءَ انسانی حقانی ادارہ ءُ یورپی یونین ءِ سرا زور داتگ کہ بلوچ راج ءِ سرا زُلم ءُ زوراکی یے ھلاپ ءَ آواز چست بہ کناں۔ آئی ءَ گُشتگ نواب براھمدگ بگٹی یے گُھار ءُ گُھارزتکانی شہادت ءِ ھلپا ءَ دو،سئے فروری ءَ بلوچستان ءَ دربند ہڑتال بیت ءُ چور، پانچ فروری ءَ پرگ بند ہڑتال ءِ جار جنگ بیتگ۔ دومی نیمگ ءَ بی۔این۔ پی مینگل ءِ رھشون اختر مینگل ءَ نواب براھمدگ بگٹی ءِ گُھار ءُ گُھارزتکانی کوش ایر جنان ءَ گُشتگ کہ اے وئیل بلوچ راجدپتر ءَ فراموش کنگ نہ بیت۔ عہد ءِ ڈکٹیٹر اے گپ ءَ ایمن مہ باں کہ شکست آہانی بھت ءَ نبشتہ کنگ بیتگ۔ آئی ءَ بی۔آر۔پی ءِ ہڑتال ءِ پلہ مرزی کنان ءَ گُشتگ کہ سیاسی کارندہ گیش ءَ چہ گیش اے ہڑتال ءَ بھر بہ زور اَنت
Comments[ 0 ]
Post a Comment