عید ءِ روچ ءَ شال رسانک جاہ ءِ دیمابلوچ وائس فار مسنگ پرسنز ءَ زھر شانی درشان کتگ

شال:بلوچ وائس فار مسنگ پرسنز ءَ عید ءِ روچ ءَ شال رسانک جاہ ءِ دیما زھرشانی کیمپ جتگ ۔یک ورانکے در کنگ بوتگ کہ اے روانک شال ءِ بازار ءَ تران بوتگ ءُ پدا زھرشانی کیمپ ءِ دیما اتکگ ءُ سر بوتگ اے درگت ءَ بلوچ وائس فار مسنگ پرسنز ءِ وائس چیئر مین قدیر بلوچ ءَ گشتگ کہ انوگ ءَ چے بلوچستان ءِ تہا 1350مردم آوار جنئگ ءُ بیگواہ کنئگ بوتگ کی اِشانی تہا250ءِ زانگولیں لاش دست کپتگنت ءُ آ دگہ انگت گار ءُ بیگواہ اَنت آئی ءَ گشتگ اگاں آوار جتگیں مردم یلہ کنئگ مہ بنت گڈا ما دیمترا اسلام آباد ءِ نیمگ ءَ لانگ مارچ کنیں اِشی ءَ پیسر ما کراچی ءُ اسلام آباد ءَ داں لانگ مارچ کتگ ءُ مزنیں وھدے ءَ داں رسانک جاھانی دیماا زھرشانی کیمپ ھم جتگ بلئے انگت گار ءُ بیگواھیں مردمانی ھچ وڑیں ھالے نیست ما گوں سرکار ءُ اے دگہ بنی آدمی حقانی گَلاں دستبندی کتگ بلئے اے درگت ءَ کسّی گوشاں مورے ھم نہ وارت وائس چیئر مین ءَ گشتگ کہ گار ءُ بیگواھیں مردمانی تہا کماش ، ورنا ، زالبول ءُ کسانیں زھگ ھم ھوار اَنت اے درگت ءَ سرکار ءِ کرّ ءُ کوری ءَ مارا افسوز اِنت آئی گشتگ اگاں سرکار ھمے رنگ ءَ کرّ ءُ کُور بیت گڈا ما الّم ءَ اسلام آباد ءِ نیمگ ءَ لانگ مارچ کنیں گڈا اے تمامیں زمہ واری سرکار ءِ سراا بنت نوں ما چدو گیش برداشت کُت نہ کنیں کہ ھروچ مئے مردم آوار جنئگ ءُ بیگواہ کنئگ بوھگ ءَ اَنت ءُ پدا آھانی زانگولیں لاش ماں جنگل ءُ گیاباناں چگل دیگ بوھگ ءَ اَنت اگاں سرکار ءَ مئے آوار جتگیں ءُ بیگواھیں مردم شھید کتگ اَنت گڈا مارا بگش اَنت کہ آ شھید کنئگ بوتگ اَنت ءُ آیانی لاشاں مارا سر بکن اَنت تاکہ مارا اوپارے بہ بیت ۔اگاں سرکار ءَ ھمے رنگ ءَ وتی زلم ءُ زوراکی برجہ داشت اَنت گڈا چدو گیش ما ھچ وڑا برداشت کُت نہ کنیں۔