تو بالاد ءَ گار کرت کن ئے بلے لیکو ارواھانی جھلانکی ءَ چیر بیت ءُ ردوم زور اِیت ' بی ایس او آزاد گودر زون ءِ گوں پاکستانی سرکار ءِ آوارجتگیں مردمانی کھول ءَ ھمدردی

شال : زورگریں پاکستانی سرکار ءِ آوار جتگیں ذاکر مجید بلوچ ، جلیل ریکی ، سنگت ثناء بلوچ ، ڈاکٹر دین محمد بلوچ ، علی اصغر بنگلزئی بلوچ ، غفور بلوچ ، مشتاق رودینی بلوچ ، سمیع مینگل بلوچ ءُ  حافظ سعید الرحمن بلوچ ءِ کھولانی شد گدان ءَ 591روچ ، شمس بلوچ ، سیف اللہ ابابکی، ولید افضل ، نبیل حاجی صاحب خان ، عبدالغفار ، عطاء اللہ ، مھراللہ لانگو، ذاکر، حسن لانگو ، کبیر بلوچ ءِ کھولاں 449روچ ، بانک زرینہ مری ءِ کھول ءَ 439 روچ ، نیاز محمد بنگلزئی ، نسیم افضل ، سمیع اللہ لانگو، افضل الرحمن ، بابا بوھیر ، آصف جھکرانی ، صابر بلوچ ءِ کھول ءَ 354 روچ ، عرض محمد  ، سفر خان مری  ، ڈاکٹر اکبر مری ، میر میروانی بلوچ ایڈوکیٹ ءِ کھول ءَ 340 روچ ، ماسٹر غلام قادر ، مزار خان ، الطاف بگٹی ءِ کھول ءَ 154روچ ، رحیم ، اقبال ءِ کھولاں 99 روچ ، ڈاکٹر وزیر مری 56 روچ ، ناکوخیر بخش ءِ کھول ءَ 25 روچ سرجم بوتگ کہ آھانی شد گدان برجاہ اَنت ۔ گوستگیں روچ ءَ اے شدگدانءَ بی ایس او گوادر زون ءِ باسکاں گوں آوار جتگیں بلوچانی کھول ءَ ھمدردی کنگ ءَ اَتکگ اَنت ءُ گوشتگ اِش کہ گوں لٹ کٹ ءَ بالاد ھلاس بیت بلے لیکو اِناں ۔انسان گندگ بنت ، دزپر کنگ بنت ، تو آھاں گیپت کن ئے ، آھاںی سر ءَ اُرش کرت کن ئے ، آھاں زندان ءَ بند کرت کن ئے ، آھاںی سر ءَ کیس جت کن ئے ، آھاں پاھو ءَ درنج اِت کن ئے بلے آھانی ھیالانی سر ءَ تئی زور مندی کار نہ دنت آ بے سمائیں رنگے ءَ شنگ بنت ، چیر بنت ءُ وتی گار کنوک ءِ چماں اَندر بنت ، ارواہ ءِ جھلانکی ءَ چیر بنت ءُ رودم زور اَنت ۔ وائس فار بلوچ مسنگ پرسنز ءِ چِیر مین قدیر بلوچ ءَ گوں بی ایس او ءِ باسکا گپ جنان ءَ گوشتگ کہ چَہ پاکستانی سرکار ءِ نیمگ ءَ آّوار جتگیں مردمانی گمگینیں مات ، گھار ، بزرگانی آہ ءُ گریوگ ءَ گوں زمین ھم آزمان ءِ نیمگ ءَ چار اِیت کہ کدی ایشانی سولیں دل ءِ بند چَہ شکنجہ جاھاں درکپ اَنت ءُ وتی پاکدامنیں مات ءِ پاداں چُک اَنت ۔مات گوں وتی سریگ ءَ آھانی ارساں پھک کن اَنت ءُ زمین یک سارتگیں اُپارگے کش اِیت ءُ گوش اِیت شکر اِنت ھاوند کہ تو منی پریات گوش داشت ءُ آوار جتگیں مردم کہ شکنجہ جاھاں جنگ ءُ چوپگ سگگ ءَ اِت اَنت آ مروچی وتی کس ءَ گوں دوچار کپت اَنت ۔