بلوچستان چَہ پاکستان ءَ سستگ ، چَہ بدل بوتگیں جاور ءُ پگراں ھاکم ترسگ ءَ اَنت ' بی این ایم

شال : بلوچ نیشنل موومنٹ ءِ جارکش ءَ گوشتگ کہ بلوچستان چَہ پاکستان ءَ سستگ ۔ بلوچستان ءِ جاور ءُ چَہ بدل بوتگیں پگراں ھاکم ترسگ ءَ اَنت پہ ھمیشی ءِ چیر دیگ ءَ ھاکماں پہ دگہ راجاں بلوچستان نوگو ایریا جوڑ کرتگ ۔ اھوالکار ، ندکار ، دانشور ءُ سیاستدان بیھار دیگ بنت کہ آ بلوچستان ءَ میاینت ۔ وھدے کہ آرمی ءُ چیریں ادارہ کہ چَہ اولی روچ ءَ بہ گر داں مروچی پاکستان ءِ سر ءَ ھاکم اَںت آھاں بلوچستان ءَ کشت ءُ کشار بنا کرتگ ۔ چمالنگ ءَ بلوچانی شھادت ، دزگیری، لوگ ءُ انبارانی آس مان دیگ رنگیں کارپد چیر دیگ بوتگ اَنت بلے آجوئی ءِ زرمبش ءِ سبب ءَ پیداک بیوکیں کارپدگیشتر پدر بنت توری ھمینچک چیر دیگ بہ بنت ۔ پاکستانی ٹی وی چینلز ءَ بے مول ءُ مراد ءُ کسانیں گپانی سر ءُ چیر کنگ ءِ آجوئی اِنت بلے راستیں ءُ سنگینیں جیڑھانی سر ءَ گپ جنگ میار اِنت ۔بلوچ یا بلوچستان ءِ بابت ءَ ھال شنگ بوگ ءَ فوج ءُ چیرادارھاں دُزگوات گرگ ءِ ترس اِنت پرچا کہ بلوچستان ءِ جیڑہ اے کچ ءَ رستگ کہ دژمن ھچ گوشت کنگ ءَ نہ اِںت ۔ دلگوش دور کنگ ءِ پالیسی ءِ سر ءَ پاکستان ءَ مذھبی ءُ مسلکی جیڑہ چست کنگ بوگ ءَ اَنت ۔ جارکش ءَ  دیمتر ءَ گوشتگ کہ ایران ءُ پاکستان ءِ میان ءَ گیس پائپ لائن چیر گیجگ ءِ کار ایوک ءَ ھالتاکانی تہ ءَ گندگ  بنت پرچا کہ آجوئی ءِ زرمبش ءِ سبب ءَ میان اُستمانی کمپنی نوکیں کراربندگ ءَ ترسگ ءَ اَنت انچوش کہ  گوادر ءَ کالونیل آبادکاری ءِ شَور نامراد بوتگ اَنت ھمے پیم گیس پائپ چیر گیجگ ءِ شور ھم ایوک گاگداں مان اِیت ۔