لندن : ملا عمر پنچسد جنگول پہ اُسامہ ءِ کستریں جنین ءِ زندان ءَ درکنگ ءَ اُرش ءَ سر گیپتگ اِت اَنت بلے بے سوب بوت اَنت

لندن :برٹش ھالتاک '' دی سن '' ءِ رپورٹ ءِ رد ءَ ملا عمر ءَ پنچسد جنگول پرمان کرتگ کہ پاکستان ءِ چیریں جاھاں بندیں اسامہ ءِ چَہ درساں کستریں جنین امل عبدل فاتح ءِ درکنگ ءَ اُرش بہ کن اَنت  کہ دگہ دو جنینانی پجیگ ءَ دزگیر اِنت ءُ پاکستانی سیکورٹی ءِ واکدار چَہ آھاں جست ءُ پرس کنگ ءَ اَنت ۔ پہ اسامہ بن لادن ءِکستریں جنین ءَ بیوکیں طالبان ءِ اے جھد بے سوب کنگ بوتگ ۔ھالتاک ءَ گوشتگ کہ اسامہ ءِ جنوزام ءِ بند بوگ ءِ جاہ ءِ نشان طالبان ءَ آھانی چاریگ ءَ سرکرتگ کہ آئی ایس آئی ءِ تہ ءَ کار کنگ ءَ اِنت بلے اے اُرش ھما وھد ءَ مھتل کنگ بوتگ کہ اے سئے جنینانی پجیگ ءَ اسامہ  ءِ پنچ چک چَہ اے اُرش ءَ پھریزگ ءُ دگہ جاھے ءَ برگ بوتگ اَنت ۔ آئی ایس آئی ءَ گوں ھمگرنچیں یک مردے ءَ ھالتاک ءَ گوشتگ کہ  چَہ گوستگیں بازیں ھپتگاں ما فوناں ٹریس کنگ ءَ اِت اِیں مارا چَہ تمن ءُ ٹکی دمگاں ھم اے ھال رستگ کہ اُرش بوگی اِنت نوں اسامہ بن لادن ءِ کھول ءِ سیکورٹی ترند گرگ بوتگ ۔ بے تاھیری داں اے کساس ءَ گیش بوتگ کہ ما گوستگیں ھپتگ ءَ سئے بر ءَ ایشانی بندکنگ ءِ جاہ بدل کرتگ ۔ گوستگیں شپ ءَ اُسامہ ءِ کھول اسلام آباد ءِ یک نیوان ءُ پھریز اِتگیں جاھے ءَ بند کنگ بوتگ اَنت ۔ 29سالی ئیں امل مئی ءَ اسامہ بن لادن ءِ سر ءَ اُرش ءِ میان ءَ امریکی فوجیانی دست ءَ ٹپی بوتگ پاکستانی واکدارانی گوشگ اِنت کہ آئی ءَ گوں سیکورٹی واکداراں کمک نہ کنگ ءِ شور کرتگ ۔ یمنی امل ءِ چَہ اُسامہ ءَ دس سالی ئیں جنکے ھم ھست ۔ واکداراں اے ترس اِنت کہ اگاں امل ءَ یلو بہ دئے اَنت آ القاعدہ ءِ نوکیں سروک بیت کنت ۔آَئی ایس آئی ءِ نزیکیں مردمانی گوشگ اِنت کہ امل پھر بند اِیت ءُ گوش اِیت کہ آ تپنگ ءِ کارمرد داں اے کچ ءَ کہ راکٹ لانچر ءِ آس دیگ ءَ ھم بلد اِنت ۔ آگوش اِیت کہ ما کافرانی ھلاپ ءَ جنگ ءِ سروگانی کنگ ءُ وتی چکاں مجاھدانی رنگ ءَ ھیلکاری دیگ لوٹ آں ۔ ھمے سبب  بیت کہ طالبان چَہ اُسامہ ءِ آ دگہ  جنییانی بدل ءَ امل ءِ چَہ پاکستانی زندان ءَ کشگ ءَ ھب اَنت بلے ھالتاک ءِ اے ھبر ءِ سر ءَ پھک ءَ باور کنگ نہ بیت کہ ملا عمر ءِ پنچسد جنگول پہ امل ءِ چَہ پاکستانی زندان ءَ کشگ ءَ ساڑی بوتگ پرچا کہ امل وزیرستان ءِ کوھاں بندیگ نہ اِنت بلکیں اسلام آباد ءُ روالپنڈی ءِ جی ایچ کیو ءَ بند اِنت کہ پہ آاُود ءَ پنچسد مردم یکپارگی دست ءُ گوش ھم روت نہ  کنت اگاں ھالتاک ءَ اے کساس کمتر کرت اِنت بہ گند ئے گپ گیشتر باوریں بوت اِنت ۔