امریکہ ایمنی لوٹ اِیت بلے پاکستان آئی ءَ جنگ تہ ءَ مین کنگ ءَ دلمانگ اِنت 'تحریک طالبان پاکستان

باجوڑ ایجنسی :تحریک طالبان پاکستان ءَ ھم پاکستان دو تل ءُ دو پوست گوشتگ ءُ اولی رند ءَ ھما بنکی ھبر کہ پاکستان ، اوگانستان ءُ امریکہ ءِ میان ءَ نوک رُستگیں جیڑھے سبب اِنت پدر کرتگ ءُ گوشتگ کہ امریکہ چَہ اوگانستان ءَ درکپگ ءُ ایمنی لوٹ اِیت بلے پاکستان آئی ءَ چَہ اُود ءَ درکپگ ءَ نہ ھلگ ءَ اِنت۔آئی ءَ اے ھم تچک کرتگ کہ اگاں اے جاورانی تہ ءَ امریکہ ءَ پاکستان ءِ سر ءَ اُرش کرت گڑا طالبان  چم ءَ بنٹ ءُ پاکستان ءَ کمک نہ کن اَنت بلکیں اے درگت ءَ چار ءُ بہ چار کن اَنت ۔ طالبان ءَ اولی رند ءَ پاکستان ءِ اوگانستان ءِ درگت ءَ پالیسی دو دیمی گوشتگ ءُ ایرجتگ ۔اے ھبر تحریک طالبان پاکستان ءِ نائب امیر ءُ باجوڑ طالبان ءِ کمانڈر مولوی فقیر محمد ءَ چارشمبے ءِ روچ ءَ بی بی سی ءَ فون کرتگ ءُ گوشتگ ۔آئی ءَ گوشتگ کہ پاکستان ءُ امریکہ دھشت گردی ءِ ھلاپ ءَ یک دومی ءِ ھمدست ءُ ھمکار اَنت بلے یک دومی ءَ پروش ھم دیگ لوٹَ اَنت ۔امریکہ چَہ اوگانستان ءَ وتی فوج ءَ کشگ  لوٹ اِیت بلے پاکستان ءِ جھد اِنت کہ امریکہ ءَ اے جنگ ءِ تہ ءَ تیلانک بہ دنت ءُ مین بہ کنت بزاں کہ دوئیں ملک گوں یک دومی ءَ ناٹک کنگ ءَ اَنت ۔آئی ءَ گوشتگ کہ پاکستان ءِ سر ءَ امریکہ ءِ چوناھیا ھم اُرش بوگ ءَ اَنت اگاں پد ءَ ھم اے جاوراں یک مزنیں اُرشے بہ بیت گڑا تحریک طالبان بِھ بے چار ءُ بہ چار ءَ پاکستان ءِ کمک نہ کنت ۔اے ھبر ءَ طالبان شوری گیشین اِیت کہ آیا آھاں امریکہ ءِ ھلاپ ءَ پاکستان ءِ کمک کنگی اِنت یا اِناں ۔اوگانستان ءِ درگت ءَ گپ جنان مولوی فقیر محمد ءَ گوشتگ کہ پاکستان ھمساھگیں ملک ءَ دوتل ءُ دوپوستیں پالیسی ءِ سر ءَ کار کنگ ءَ اِنت پمیشکا جاورانی تہ ءَ گھتری ءِ گمان گندگ نہ بوگ ءَ اِنت ۔ داں وھدے اے پگر پراھوان کنگ مہ بیت کہ گوں ھمساھگاں ایمنی ءَ نندگی اِنت دوئیں ملکاں جاور گھتر نہ بنت ۔ نائب امیر ءَ گوشگ اَت کہ امریکہ چَہ اسلامی ملکاں وتی فوج ءَ بہ کش اِیت ءُ تمنی دمگاں ڈرون اُرشاں بند بہ کنت گڑا آھاںی ھلاپ ءَ اُرش کم بوت کن اَنت ۔