کرنل قذافی ءِ کسہ ھلاس بیت۔

لیبیا ءِ شخصی درچ ءَ مانگیشتگیں رھشون کرنل قذافی یک نیمگے یک ٹوھیں زوراکی زانگ بیتگ۔ بلے دومی نیمگ ءَ کرنل قذافی جمال ناصر ءَ رند اولی عرب رھشون ات کہ آئی ءَ ”عرب نیشنلزم” ءِ جار جت۔ لیبیا ءِ سی ءُ نوہ سالاں اُگدہ ءِ سرا نندوکیں قذافی سکیں زوراک ءُ زالمیں مردمے زانگ بیتگ۔ یک نیمگے آئی ءَ ماں لیبیا ءَ وتی ھلاپ کارانی سرا باز زُلم کُتگ ۔ دومی نیمگ ءَ آ روکپتی سامراج ءِ چم ءِ کُنٹگ جوڑ بیتگ، یک نیمگے اگاں ما ماں لیبیا ءَ وتی ھلاپ کارانی سرا آئی ءِ زوراکی ءَ ھمنچو ایر جنیں بلے کم انت۔ دومی نیمگ ءَ ما مغربی سامراج ءِ دیم ءَ چو مُھکمیں دیوال ءَ اوشتگے سرا ما آئی ءِ بھادری ءُ تمردی ءَ ھمنچو بہ ساڈائیں ھم کم اِنت۔ چیاکہ قذافی یک نمگے بلاھیں ظالم ءُ زوراکی اَت ۔بلے آ چو اے دگہ عرب لیڈرانی وڑا چم جھل ءُ بے دلیں مردمے نہ اَت۔۔ گوشنت کہ بھادر دو جاگہ پجارگ بیت یکے جنگ ءِ میدان ءَ دومی مان قبر ءَ۔۔ قذافی زوراکی ءَ ابئید یک بھادر ءُ تمردیں انسانے اَت۔۔آیوکیں وھد ءَ عرب قوم آئی ءَ الم گیر کاریت۔۔ اُگدہ ءِ دز گرگ ءَ رند اے ھمے زوراکیں قذافی ءُ آئی ءَ عرب نیشنلزم ءِ جار جت ءُ عرب قوم ءِ ھوری ءُ یکجاھے ءِ گپ جت۔۔عرب رھشونانی تھا جمال ناصر ءَ پد مسریں نام کرنل قذافی اِنت کہ آئی ءَ دُنیا ءِ ھر مراگش ءُ فورمانی تھا عرب بزگی ءُ لاچاری ءِ آواز چست کُتگ ءُ عرب قوم ءَ یک اتحادی فلیٹ فارمے ءِ سرا تپاک ءُ یکجاہ کنگ ءِ درس داتگ۔۔یک نیمگے ڈکٹیٹر قذافی ءُ دومی نیمگ ءَ آئی ءَ وتی لیبیا ءِ سیاسی رھبند ءِ سرا نبشتہ کُتگیں  کتاب ”دی گرین بُک” ءِ تھا یک اَنچیں سوشلسٹ اسٹیٹے ءً دروشم دیم ءَ آؤرتگ کہ مردم ھیران بیت کہ قذافی ءَ کُجام شاھیم ءَ تور بہ کنت۔۔ پدا ھیران کنوکیں گپ اش انت آئی ءَ ھمے کتاب  ءِ تھا عرب سوشلزم ءِ گپ جتگ۔۔ کواس گوشنت لیبیا ءِ سوشلسٹ اسٹیٹے ءِ درچ ءَ آرگ ءِ واھگ چہ  ڈکٹیٹر قذافی ءِ جند ءِ سوب ءَ ناسرجم بیتگ اَنت۔ چیاکہ لیبیا ءِ سیاسی نظام ءِ تھا آئی ءِ دزمانجی ھدا چہ گیش بیتگ۔ آئی ءَ مخالفت برداشت نہ کُتگ۔ آئی ءِ ناکامی ءِ مستریں سوب اے بیتگ کہ آئی ءَ یک اَنچیں سوشلسٹ ریاستے لوٹ کُتگ کہ آ ریاست آئی ءِ ذاتی لوٹانی مطابق ءَ بہ رؤت۔ قذافی ءِ اے عمل کم ءُ باز ماں سوویت یونین ءِ ڈکٹیٹر اسٹالن ءَ چھرگ ءَ جنت۔۔پمیشا دُنیا ءِ دیم ءَ آ یک زوراکی نامینگ بیتگ۔۔۔۔۔۔قذافی ءِ یک دگہ تمردی ئے اے بیتگ کہ آ لیبیا ءِ وڑیں یک ٹکی حوالہ یک پُرشت ءُ پروشیں ملکی ءِ چن ءُ نز آر ءَ سوب مند بیتگ ءُ آئی ءَ لیبیا ٹکی ءُ قبائلی رھبندیں کش اِتگ ءُ یک مھکم ءُ منظمیں قومیت ئے ءِ بُنیادءَ یکجاہ کُتگ۔ پمیشا آئی ءِ چہ رند ھمے گُمان ھم استیں کہ لیبیا ”فیوڈل وار” آماچ مہ بیت۔۔

دومی نیمگ ءَ ناشرکارانی گُما سیادی دارگ ءِ بُھتام ءَ قذافی میان استمانی تکاں باز بدنامیں مردمے زانگ بیتگ۔۔امریکا ءِ نیمگ ءَ 1986 ءَ ماں جرمنی ءَ شپ مراگاھے ءَ( نائت کلب) بمب اُرشے ءِ بُھتام ھم قذافی ءِ پاد ءَ دیگ بیتگ۔ چر ایشی ءَ دو امریکی فوجی مُرتگ۔ مغربی سامراج ءِ ديم ءَ قذافی بازیں وھدی ءَ یک مُھکمیں دیوالے زانگ بیتگ ۔بلے دو ھزار سے ءَ قذافی مغربی سامراج ءِ گُما گند ءُ نند ءَ ساڑی بیت۔۔او آئی ءَ اے گپ ھم رندا من اِت کہ ماں ”لاکربی” ءَ بمب اُرش ءَ منی (قذافی) ءِ دست مان بیتگ کہ چر اے اُرش ءَ دوسد ءُ پنجاہ ءَ گیش مردم بیران بیتگ۔۔قذافی ءِ ردا آئی ءَ اے بمب اُرش پمیشا کُتگ کہ امریکا  ءَ پیسر ءَ ماں لیبیا ءَ آئی ءِ گسے سرا اُرش کُتگ ۔چر ایشی ءَ چہ آئی ءِ خاندان ءِ سے مردم بیران بیتگ۔۔وھدیکہ گوستگیں سال ءَ ماں لیبیا ءَ قذافی سرکار ءِ ھلاپ ءَ نیٹو ءُ آدگہ سامراجی مُلکانی ارش بندات بیت گُڑا قذافی ءَ  اے گپ الم مارتگ کہ آ اے جنگ ءِ دیمپانی ءَ کُت نہ کنت،،چیاکہ ماں لیبیا ءَ سیاسی مخالف آنی سرا قذافی ءِ زلم ءُ زوراکی ءِ سوب ءَ لیبیا ءِ تھے مردم ھم چہ قذافی ءَ بیزار اِتاں ءُ آ قذافی ءِ ھلاپ ءَ جنگ ءَ ساڑی اِتاں۔۔نو یک گپے مارا زانگ لوٹیت کہ ماں عرب دُنیا ءَ قذافی وڑیں ڈکٹیٹر دگہ بازیں ،پرچا تھنا قذافی مغربی سامراج ءِ چم ءِ کُنٹگ اَت۔۔اے گپ ءَ چہ ھمے پدریں کہ ھر کس مغربی سامراج ءِ نپانی دیم ءَ دیوال بہ بیت ،سامراج وڑی ناں وڑی آ دیوال ءَ پروشیت ءُ وتی راہ ءَ پچ کنت۔۔سامراج وتی نپانی برجم دارگ ءَ ھما کار ءَ کنت کہ آئی ءِ دست ءَ بيت.  قذافی  وا شُت۔۔بلے دومى  عرب ھم وتی گندلاں چہ آپ ءَ بہ کش اَنت ءُ جنگ ءَ ساڑی بہ بنت۔ یا پہ مُدامی غلامی ءِ زند ءَ قبول بہ کن اَنت ءُ بیگواہ بہ بنت۔۔۔