میکسیکو: راست گوشی ھر جاہ ءَ گُٹگیریں۔

میکسیکو: میان استمانی گل یو۔این۔او ءِ ردا میکسیکو پہ ھالکاراں دُنیا ءِ پنچ بیمناک تریں  مُلکاں گوں ھواریں  کہ اودا ھالکار کُشگ بیئگ ءَ اَنت۔ گوستگیں دہ سالاں ماں میکسیکو ءَ ھپتاد ھالکار کُشگ بیتگ۔ یو۔این۔ او ءُ انسانی حقانی گلے ءِ نیمگ ءَ شنگ بیتگیں یک ھواریں رپورٹے ءَ گوشگ بیتگ کہ دوھزار یازدہ ئے گوستگیں نوہ ماھاں ماں میکسیکو ءَ سیزدہ ھالکار کُشگ بیتگ۔رپورٹ ءِ ردا گوستگیں دہ سالاں مُلک ءَ ھپتاد ھالکار کُشگ بیتگ ءُ سیزدہ بیگواہ اِنت۔ ھالکارانی گیشتریں کچ ”درگ مافیہ” ءِ ھلاپ ءَ ھالکاری ئے وھد ءَ کُشگ بیتگ اَنت۔ میکسیکو دری کارانی کمیٹی ءِ اسسٹنٹ سیکرٹری جیسس زامور ءَ گوشتگ کہ سرکار ھالکارانی نگھداری ءِ ھاترا جوانیں گامگیج زیرگ اِنت۔۔