سرمایہ داری رھبند ءِ ھلاپ ءَ زھرشانی، آسر چے درکئیت؟ یا راجدپتر مارکسی لیکہے راستی ءَ پدر کنت؟

میان استمانی نھادی کارجاہ ءُ سرمایہ داری رھبند ءِ ھلاپ ءَ زھرشانی کنوکیں مردمانی او پولیس ءِ میان ءَ بازیں جنگ ءُ چوپاں پد ، زھرشانی کنوکاں لندن، فرینکفرٹ ءُ ایمسٹرڈم ءِ شھراں گدان جتگ ءُ نشتگ انت۔۔۔اے جاوراں چہ ھمے پدر بیت کہ زھرشانی کنوک سرمایہ داری رھبند ءِ ھلاپ ءَ وتی زھرشانی ءَ ادا آسر نہ کن انت ءُ دیم ءَ جاری دارنت۔۔۔پدا اے زھر شانی کنوکاں وتی گدان ھنچیں جاھاں جتگ انت کہ اے ھند اقتصادی کارجاھانی بُنجل اَنت۔۔۔زھرشانیانی اے درچ ”وال اسٹریٹ ءَ قبضہ کنے” ءِ سرھال ءِ زرمبش ءِ پشدر ءَ بندات بیتگ۔۔اے زرمبش ءَ دُنیا ءِ ھشتاد مُلکانی دو صد شھر مان پتاتگ انت۔۔گوستگیں روچ ءَ لکھاں مرداں بینک۔ نھادی کارگسانی گیش ءَ چہ گیشیں قوت ءُ سرمایہ داری نظام ءِ ھلاپ ءَ احتجاج کُتگ۔۔۔لندن ءَ زھرشانی کنوکاں وتی گدان لندن اسٹاک ماکیٹ ”سنیٹ پال کیتھیڈرل” ءَ دیم ءَ جتگ ءُ نشتگاں کہ اے گدانانی(کیمپ) کساس ھپتاد ءَ گیش بیت۔۔وھدیکہ زھرشانی کنوکاں اے گپ پدر نہ کُتگ کہ اے زھر شانیاں لڑ تاں چنکہ وھد ءَ جاری مانیت۔۔جرمنی ءَ زھرشانی کنوکاں فرینکفرٹ شھر ءَ یورپی مرکزی بینک ءِ دیم ءَ وتی گدان جتگ ءُ نشتگاں کہ اے بینک پیش ءَ یورو کرنسی زون ءِ جھل کپگ ءِ سوب ءَ اقتصادی تیلانکانی آماچ انت۔۔یک شنبہ ءِ روچ ءَ یو۔ این۔ او ءِ سیکرٹری جنرل بان کی مون ءَ وتی یک ھالترانے ءَ میان استمانی رھشونانی سرا زور دیان ءَ گوشتگ کہ آ زھرشانی کنوکیں مردمانی پیغام ءِ گوشدارگ ءِ جُھد ءَ بہ کناں۔۔شنبہ ءِ روچ ءَ نیوویارک ءِ شھر ءَ زھرشانی کنوک ءُ پولیس ءِ میان ءَ بازیں جنگ ءُ پروشگاں پد پولیس ءَ نود دو کس دزگیر کُتگ۔۔وھدیکہ اطالیہ ءِ شھر روم ءَ پولیس ءُ زھرشانی کنوکیں مردمانی میان ءَ جنگ ءُ چوپاں یک سد ءُ چِل مردم ٹپی بیتگ انت۔۔ٹپیانی تھا گیشتر پولیس کارندہ ھواراں ،اے ردا پولیس ءَ دوازدہ کس دزگیر کُتگ۔۔یک شنبہ ءِ روچ ءَ امریکی شھر شگاکو ءَ امریکن پولیس ءَ زھرشانی کنوکانی گدان پروشتگ انت ءُ اے ردا یک سد ءُ ھپتاد ءُ پنچ مردم دزگیر کُتگ انت۔۔اے ردا اگاں پہ راستی چارگ بہ بیت گُڑا اے گپ الم پدریں کہ نو دُنیا چہ سرمایہ داری نظام ءَ بیزار بیتگ۔۔یا اے جاور سرمایہ داری نظام ءِ بے سوبے ءِ پژدر ءَ چارگ نہ بنت؟ یا اے مارکسی لیکہے راستی ءِ پدرائی ءِ درچ ءَ چارگ نہ بنت؟؟۔۔۔