سرمایہ داری رھبند ءِ ھلاپ ءَ زھرشانی ۔

نیویارک: سرمایہ داری نظام ءِ ھلاپ ءَ زھر شانی امریکا ءَ ابئید یورپ۔ ایشیا ءَ افریقی ھند ءُ دمگاں سر بیتگ۔۔اٹلی ءَ پولیس ءُ زھر شانی کنوکانی میان ءَ جنگ ءُ چوپاں ھپتاد مردم  ٹپی بیتگاں۔۔بازیں گاڑی ءُ کارجاہ ماندارگ بیتگ انت۔۔لندن ءُ نیویارک ءَ ھم جنگ ءُ چوپ برجاہ انت ،باز کس دزگیر کنگ بیتگ۔وال اسٹریٹ ءِ سرا قبضہ کنگ ءِ سرھال ءَ بندات بیتگیں اُلسی زرمبش امریکا ءَ ھوار دُنیا ءِ دگہ ھم بازیں مُلکاں سر بیتگ۔۔اے زھر شانیاں ھواریں مردمانی گیشتریں کچ ورناھ ءُ گونڈلانے انت۔۔اے السی زھرشانی سرمایہ داری رھبند، بزگی ، لاچاری ءُ زات ءُ زُریات ءِ وتگڑیں رھبند ءُ اٹامک انرجی ءُ دگہ بازیں چاگردی سلکاریانی ھلاپ ءَ برجم دارگ بیتگ۔۔نیویارک ءِ ٹائم سکوائر ءَ پولیس ءُ مھلوک ءِ میان ءَ جنگ ءُ بجنگاں یک مردمے ٹپی بیتگ ءُ بیست ءُ چار دزگیر بیتگ انت۔۔لندن ءَ ھم سرمایہ داری نظام ءِ ھلاپ ءَ مردم دگانی سرا درکپتگ انت وکی لیکس ءِ سروک جولیان اسانج ھم زھر شانی ءَ ھوار کپتگ۔ پولیس ءُ مھلوک ءِ میان ءَ کسان کسانیں جنگ ءُ چوپ ھم بیتگ، بلے ھچ کس ئے ٹپی بیئگ ءِ ھال نیست،،اٹلی ءِ مزن شھر روم ءَ مھلوک ءُ پولیس ءِ میان ءَ جنگ ءُ چوپاں ھپتاد کس ٹپی بیتگ انت۔۔پولیس ءِ ردا زھرشانی کنوکاں دبوکہ جتگ ءُ اوشتاتگیں گاڑیانی سرا اُرش کُتگ ءُ  بازیں گاڑی مانداشتگ انت۔۔سڈنی، میکسیکو، چِلی، ارجنٹینا، ایتھنز، برلن، ٹوکیو ءُ ھانک کانگ آں ھم بازیں مھلوک دگانی سرا درکپتگ انت ءُ زھر شانیاں بھر زُرتگ ئے۔۔۔کنیڈا ءِ بازیں شھراں ھم کارپوریٹس ءِ ھلاپ ءَ یک مُشتی ءَ گوں زھرشانی ءِ جار جنگ بیتگ۔۔ملائشیا ءِ مھلوک ھم سرمایہ داری نظام ءِ ھلاپ ءَ پاد اَتکگ انت۔۔وال اسٹریٹ ءِ سرا قبضہ کنگ ءِ سرھال ءَ بندات بیتگیں اے اُلسی زرمبش ءِ فیس بُک ءُ ٹویٹراں ھم شنگ کنگ ءِ شریں وڑی ءَ کار بُنگیج بیتگ۔۔۔