عالمی انسانی حقانی گل ءُ یو۔ این۔ او ماں بلوچستان ءَ بلوچ ورناھانی آوار جنگ ءُ پہ بے دردی قتل عام ءِ ھلاپ ءَ ھاسیں گامگیج بہ زیر اَنت۔۔ وائس فار بلوچ مسنگ فرسنز

وائس فار بلوچ مسنگ فرسنز ءِ کارمستر واجہ نصراللہ بلوچ ءُ کمک کارمستر قدیر بلوچ ءُ گار ءُ بیگواھیں بلوچ ورناھانی  سیاد ءُ وارثاں وتی ھالترانے ءَ گوشتگ کہ سمیر رند ، واحد بالاچ ،غلام اللہ ءُ مطلب بلوچ ءِ آوار جنگ ءُ رند ءَ آمیدگس ءِ دیم ءَ نیارگ ءُ ماں شیپ ءُ چاھراں آھانی جتگ ءُ چُپتگیں لاشانی چگل  دیگ  انسانی حقانی بد تریں ھلاپ ورزی ءِ درچ ءَ کئیت۔۔آھاں گوشتگ ماں بلوچستان ءَ ایف۔سی ءُ چیریں ایجنسیانی دست ءَ بلوچ بچانی آوار جنگ ءُ آھانی پہ بے دردی شھید کنگ ءُ لاشانی  دور  دیگ برجاہ انت۔۔گار ءُ بیگواھیں ورناھانی سیاد ءُ وارث احتجاج کن انت۔۔بلے آزاد آمیدگس ءِ جار جنوکانی گوش ءَ مورے  ھم  نہ وارت۔۔ما  آھانی  اے  کرداں ھمنچو ایر بہ جنیں پدا ھم کم انت۔۔آھاں گوشتگ ماں بلوچستان ءَ زُلم ءُ زوراکی ءِ ھلاپ ءَ عالمی انسانی حقانی کارگس ءُ یو۔این۔او بس لھتے رپورٹانی  شنگ کنگ ءَ ابئید دگہ ھچ وڑیں ھاسیں  کردے  پیلہ  کنگ ءَ  نہ اَنت۔۔چر ایشی ءَ چہ گار ءُ  بیگواھیں  ورناھانی سیاد ءُ وارث دلپدرد ءُ دلپروش  بیتگاں۔۔آھاں  یک رندی پدا چہ عالمی  انسانی  حقانی گل ءُ یو۔ این۔ او ءَ دزبندی  کُتگ ءُ آ ماں بلوچستان ءَ بلوچ ورناھانی  آوار جنگ ءُ پہ  بے دردی قتل عام ءِ  ھلاپ ءَ ھاسیں گامگیج بہ  زیر اَنت۔۔