من ءَ دُنیا گُشیت دیوانگ.......راجدپتر

بلوچ راج دُنیا ءِ ھما راجیں کہ آ کرمان ءَ بگر تاں سندھو دیش ءِ سیمسر ءُ ژوب ءَ یک پراہ ءُ شاھگان ءُ مال ءُ مڈی ءَ چہ چکاریں سرڈگارے ءِ واھُندیں۔۔۔ماتیں  بلوچستان بلوچ ءِ  پت ءُ پیرکی ھنکین ءُ دیاریں۔۔راجدپتر ءِ ردا بلوچ اے  سرڈگار ءَ شش ھزار سال انت کہ جاہ منند ایں۔۔۔بلوچستان ءِ ھند ءُ دمگاں در کپتگیں دمب ءُ آثارانی لیکار ءُ دزکشیں  اکساں  چہ ھمے نشوندھی  رستگ  کہ اے  سر زمین ءَ مرچی ءَ چہ چار ھزار سال  پیش یک انچیں  راجی  جاہ  منند  بیتگ  کہ  آئی ءِ راجی  ربیت  ءُ دودمان ءُ چاگردی زند ءِ ھر تک ءُ  پھنات گوں انوگیں بلوچ راجی زند ءُ ربیتاں  گوں ھمگرنچ  بیتگاں۔۔   ایشی ءَ چہ  ھمے نشوندھی  رسیت  کہ بلوچ ھزاراں  سال  ھمے گُلزمین ءَ  جاہ منندیں۔۔بلے  نہ زاناں کہ پہ کُجام جُرم ءِ سزا ءَ بلوچ وتی  جند ءِ سر زمین ءَ  چو درامدیں ۔۔اے بلوچ ءِ بد بھتی انت  یا راجدپتر ءِ گزب؟  بلوچ ءَ زندگی ءَ اے سرزمین ءَ وشی نہ دیستگ۔۔۔۔برے وت  ماں وتی  جنگ ءُ بجنگ ،،او برے درامدیں راجانی اُرش،،،او  برے زوراکیں  سردارانی زُلم ءُ  ستم۔۔۔بلے یک وھدی انچیں ھم اتک کہ بلوچ ءِ جوانتریں ھاکم نصیر خان نوری ءَ بلوچ راج چِت ءُ یک جاہ کُت۔۔درامدانی  دست ءَ بلوچ ءِ آوار جتگیں ھند پچ گپت انت ءُ بلوچستان یک کاملیں استانے ءِ دروشم دات۔۔۔اے وھد پہ بلوچ ءَ تاریخ ءِ وشتریں عھداں گوں شمار بیت۔۔۔ایشی ءَ چہ پد دگہ بازیں خان ءُ سرداراں نوری ءِ سرڈگار ءِ سرا ھاکمی کُت۔۔انگریزاں بازیں جنگ ءُ بجنگاں ابیئد بلوچستان ءِ سرا آ وڑ قبضہ کُت نہ کُت کہ ایشیا ءِ آ دگہ ھندانی سرا آئی ءِ قبضہ ات۔۔خان مھراب خان ھم یک شرپ مند ءُ راج پھازیں بلوچ ھاکمے اَت کہ آ پہ مڑاھداری انگریز ءِ لشکر ءِ دیم ءَ درتک ءُ پہ ماتیں سر ڈگار ءَ وتی گھگیریں سرے ندر کُت۔۔۔بلے اے ردا ءَ ما اگاں بچاریں تا گُڑا بلوچ ءِ نابود تریں خان میر احمد یار خان ات کہ اے مرد ءَ پہ مرگ ءِ تُرس ءَیا پہ لاچاری  بلوچ ءِ پت ءُ پیرکی  سرڈگار وتگڑیں پاکستانی ھاکماں بخشات۔۔۔اے  مرد ءَ اے ھم نہ چار اِت کہ من یک انچیں فیصلہے  کنگایاں  کہ چر ایشی ءَ یک راجی وتی جند ءِ سرڈگار ءَ درامد بیت ءُ ۔۔بلے اے فیصلہ ءَ ما خان ءَ میار بار کُت نہ کنیں ۔۔مستریں میار ھما مکران ءِ ءُ خاران ءِ لسبیلہ ءِ سردارانی انت کہ آھاں وتی  دیم سیاھ کُت خان اِش دروہ اِت ءُ گوں پاکستان ءِ گُما سٹ ءُ سودا اش کُت۔۔یکے آواران ءِ مُراد نامیں مردی اَت کہ آئی ءَ درستاں چہ پیش پاکستان ءِ گُما ھوار بیئگ ءِ پلہ مرزی ءَ بیانے جاری کُت۔۔بِزاں ھمے مُراد آوارانی۔۔من نہ زاناں اے مرد جناح ءَ چی داتگ اِتنت کہ ایشاں بلوچ ءِ پت ءُ پیرکی سرڈگار پاکستانی ھاکماں  بخشات ءُ بلوچ راج پہ مُدامی وار ءُ بزگ کُت۔۔۔بزاں بلوچانی بربادی ءِ روچ ھما وھد ءَ بندات بیت کہ بلوچ ءِ لھتے زر دوستیں سرداراں گوں پاکستانی حاکماں سٹ ءُ سودا کُت ءُ پہ زر ءِ لالچ ءَ وتی  پت ءُ پیرکی سر ڈگار بخشات۔۔۔انسانی راجدپتر ءَ چوشیں مثال باز کم اِنت۔۔۔۔گُشنت کہ انسان ءِ چمانی آپ بہ کپیت ، آ بے غیرت بہ بیت گُڑا آ پہ زر ءُ ذاتی نپانی ھاترا ھر شئے آں ببا دات کنت۔۔بلے بلوچ ءِ اے سرداراں بے آپے ءِ ھمک حد ءُ سیمسر گواز کُتاں۔۔۔ایشاں ھما کُت کہ نوری نصیر خان ءِ ارواہ ماں قبر ءَ تلوسیت۔۔۔ایشاں پہ بلوچ راج ءَ یک اَنچیں آسے روک کُت کہ تاں روچ ءِ مروچی بلوچ ھمے گپگپیں آس ءَ سُچگ اِنت۔۔۔ما ھمنچک اے مردانی بدیں کرداں  چیر بدئیں  ،،بلے  تاریخ ھما بے ریائیں شاھیم اِنت  کہ ھر کسی بدین ءُ نیکیں کرداں وھد ءِ شاھیم ءَ تور کنت،،،بلوچ راجدپتر ءِ نمیرانیں سراں یکے میر نصیر خان ات آئی ءَ بلوچ راج یک پراہ ءَ شاھگانیں سرڈگارے واھُند کُت۔۔دومی مھراب خان کہ آئی ھما وھد بے دلیں سرداراں گوشت کہ انگریز ءِ لشکر باز مُھکمیں تو مقابلہ کُت نہ کنے۔۔بلے آئی ءَ گوشت کہ من درستاں چہ شرتر زاناں انگریز باز زوراکیں ،،بلے روباہ ءِ زندگی ءَ چہ شیر ءِ مرگ جوان تریں۔۔من ءَ تاریخ الم گوں جوانیں لبزاں گیر کاریت۔۔آ ماتیں سرڈگار ءِ پھازگ ءَ درتک ءُ گوں وتی کمیں لشکر ءَ وتی گھگیریں سر اِش ندر کُت  ءُ  نمیراں بیتاں۔۔۔دومی ھمے مرد کہ وتی ماتیں سرڈگار ءِ گُم ءُ دگا اِش کُت ءُ راجدپتر ءِ آدینک ءَ وت ءَ سیاہ رو کُت ئے۔۔۔۔۔۔نو ھمایانی روک کُتگیں  آس ءَ روچ مرچی بلوچ راج بُن ایں۔۔۔۔گُشنت کہ وھد ءِ ھمراھی ءَ وتی ننگ ءُ غیرت ءِ بھا کنوکانی نوکیں نوکیں توجیل دیم ءَ کاینت۔۔۔مرچی یک رندی پدا بلوچ راج ءَ وتی ننگ ءُ غیرت ءِ پھازگ ءَ جنگے بندات کُتگ۔۔شیطان گونگیں زوراک یک رندی پدا ماں بلوچ ءِ سرڈگار ءَ بلوچ ورناھانی خوناں گوں رجینگ انت۔۔دومی نیمگ ءَ ما گندیں کہ ھمے مات  بھا کنوکانی نوکیں نوکیں لیکہ دیم ءَ آیگ انت،،،پدا مرچی اے مات ءِ سوداگراں وتی شیطانی ھیال ءَ لیکہ سائنسی  رنگ  ھم داتگ انت۔۔۔بزاں سائنٹیفک  بُنیاداں وتی ننگ ءِ بھا کنگ۔۔سائنسی رھبندانی سرا وتی مات ءِ سودا جنگ۔۔۔ھمے  ڈیموکریٹک جِد ءُ جُھد۔۔۔سیلف ڈیٹر منیشن۔۔ھمے عجبیں عجبیں گالبند۔۔۔مئے بزگیں راج بائدیں اے گپ ءَ پوہ بہ بیت کہ اے ٹرم ءُ گالبند ھما کثیرالقومی استاناں کارمرز بنت  کے آ راجانی تاریخی ءُ جغرافک ھد ءُ سیمسر شریں وڑی ءَ نہ گیش اِتگاں۔۔آ راج کرنان کرن ھمگرنچ ءُ ھمدست بیتگاں۔۔۔بلے بلوچ وت یک تاریخی بستار ، زبان ءُ جُتائیں کلچر ءُ جُغرافک سیمسری ءِ واھندیں۔۔پدا بلوچ وا شست ءُ پنچ سالیں پہ زور غلام کنگ بیتگ۔۔۔بلوچ وتی راجی آجوئی ءِ جنگ ءَ کنگیں۔۔۔نو اے صوبائی وتواکی ءُ ھمے سیلف ڈیٹر منیشن چے بلاھاں پہ زور مئے سرا مُشگ بیتگ انت۔۔۔۔نو بائد بلوچ ھوش بہ کنت ایشانی وتگڑیں گپاں مئیت۔۔بلوچستان وا الم  آجو  بیت۔۔بلوچ بچانی رِتکگیں  ھون تاوان نہ بنت۔۔بلے ھمے سیلف ڈیٹر منیشنی ءُ صوبہ خان آں راجدپتر معاف نہ کنت۔۔۔۔اے روسیاہ  بنت،،انگت وھد اَست ھوش بہ کن اَنت۔۔اگاں ناں گُڑا اے  ھم گوں ھماھاں  کہ آھاں پیش ءَ ھر راج ءُ ھر ھنداں وتی ماتانی سودا جتگ۔۔۔۔۔۔