بلوچستان ءُ کردستان ءِ آجوئی ءِ جھد دمگ ءَ مھلوک ءِ آشوب ءِ مستاگ اَنت ' خلیل بلوچ

شال : بلوچ نیشنل موومنٹ ءِ چیئر مین خلیل بلوچ ءَ گوشتگ کہ بلوچ سرزمین ءِ سر ءَ زور گیراں ایف سی ءُ فوجی سپاھیگانی کساس گیش کرتگ ءُ جنگی مشینری تیز کرتگ اَنت ۔ مشکے ءُ آئی ءِ کش گورءَ ایف سی ءُ آرمی چوکیانی کساس ھم گیش کنگ بوتگ ۔ دومی نیمگ ءَ چَہ سرجمیں بلوچستان ءَ نوشتہ کار ، دانشور ءُ سیاسی سروکاں آوار جنگ ءَ پد شھید کنگ ءِ درچ ھم برجاہ اِنت ۔ بی این ایم ءِ عبدالصمد بلوچ ءُ نامداریں اھوالکار ءُ کالم نویس جاوید رند ھم چَہ حب ءِ  بازار ءَ آوار جنگ ءَ پد بیگواہ کنگ بوتگ ۔ توامیں ریاستی جبراں ابید ھم بلوچ آجوئی  زرمبش وتی ابرمی کارپد ءِ بنچک ءَ جوانیں رنگے ءَ برجاہ اِنت ۔ خلیل بلوچ ءَ گوشتگ کہ جھان ءَ برجاھیں سیاسی ، روزگاری ، باپاری ءُ مالی جنجالانی سبب انوگیں بند بست ءِ بے سوب بوگ اِنت کہ ایشی ءِ تہ ءَ راج پہ زور ایرجیگ ءُ چیر دست کنگ بنت ۔ دھشتگردانی ھلاپ ءَ جنگ ءِ نام ءَ آجوئی ءِ ھلاپیں سوچ ءُ گروپس رودوم دیگ بوگ ءَ اَنت ۔ پاکستان ءَ اگاں پہ میان اُستمانی ، فوجی ءُ جنگی گزراں کمک مہ رس اِنت گڑا پاکستان ءَ داں اینچک دیر ءَ بلوچستان ءِ سر ءَ زور گری برجاہ داشت نہ کرتگ اَت ۔دمگ ءِ تہ ءَ ایوک جنگی گزر ءُ لوٹانی سر ءَ دلگوش دیگ بوگ ءَ اِنت مھلوک یا راج ءَ ھچ نہ رسگ ءَ اِنت ۔ چَہ انسانی جنجالاں بے سما ئیں ھاکم درساں پہ پلمال کنوکیں بندبست ءِ پھریزگ ءَ کارمرد کنگ ءَ اَنت ۔ وانگ ، جاندراھی ، دیمروی ءُ ایمنی ءِ ایوک ءَ ھبر کنگ بوگ ءَ اِنت ۔آئی ءَ گوشتگ کہ دمگ ءِ راجاں آجو کنگ ءَ پد جنجال ھلاس بیت کن اَنت ۔ بلوچستان ءُ کردستان ءِ آجوئی ءِ جھد دمگ ءِ تہ ءَ مھلوک ءِ آشوب ءِ مستاگ اَنت ۔