بی این پی ءِ ووٹر لسٹ ءُ مردشماری ءِ سر ءَ بے تاھیری

شال :پہ الیکشن ءُ مردم شماری ءَ بے تاھیریں بی این پی  اے درگت ءَ ٹپ ما ٹپ دیوان ، مراگش ءُ زھرشانی کنگ ءَ اِنت ۔ اے درگت ءَ زیک چاردہ ستمبر ءَ بلوچستان نیشنل پارٹی ءِ بنجاھی سیکرٹریٹ ءَ یک دیوانے بوتگ دیوان ءِ پاگواجہ شال ءِ ھنکین کماش غلام رسول مینگل بوتگ ءُ گچینی مھمان بنجاھی جارکش آغا حسن بلوچ اَت ، چَہ ایشاں ابید دیوان ءِ تہ ءَ بنجاھی پوریاتی کارگشاد حاجی عبدالرزاق لانگو، بی ایس او  ءِ بنجاھی جارکش نذیر بلوچ ءُ بنجاھی راھشون غلام نبی مری ، موسی بلوچ ، خالد دلسور ،نذیربلوچ ، رحمت اللہ بلوچ ، فیض اللہ بلوچ ، اسد ، سفیر بلوچ ،  اقبال بلوچ ءُ دگراں بھر زرتگ ۔ دیوان ءِ تہ ءَ گوشگ بوتگ کہ چَہ نادرا ءُ الیکشن کمیشن ءِ نیمگ ءَ گوں شال ءِ بلوچاں سرجمیں بلوچستان ءِ لکھاں بلوچانی چَہ ووٹر لسٹ ءَ کشگ ءِ کار ایرجنگ کرزیں کارپدے ۔ الیکشن کمیشن ءَ وتی جانبداری پدر کرتگءُ بلوچاں چَہ مردم شماری ءَ  بھر زورگ ءَ دارگ ءِ  پندل سرجم کنگ بوتگ اَنت کہ اسٹبلشمنٹ ءِ بلوچ دژمنی اِنت ۔چَہ چل لکھ ءَ برز اوگان پناھگیر شال ءُ بلوچستان ءِ پشتون دمگاں ووٹرلسٹ ءِ تہ ءَ ھوار کنگ بوتگ اَنت نادرا ءَ زر ءِ سر ءَ دورگیں پجار کارڈ ھم جوڑ کنگ بوگ ءَ اِنت ۔