روتاک توار ءِ بند کنگ ءَ سرکار وتی سوبمندی زانگ ءَ اِنت ' بی این ایم

شال : بلوچ نیشنل موومنٹ ءِ جارکش ءَ گوشتگ کہ بلوچ دانشور ، نوشتہ کار، لچہ کار ءُ ندکارانی آوار جنگ ءُ شھادت ءَ رند ھم بلوچ جھد ءِ تہ ءَ آشوبی ءُ زانشتی  سنچ دیمروی کنگ ءَ اَنت کہ چَہ دژمن ءِ برداشت ءَ ڈن اِنت ۔ جبر ءِ توامیں راھبند بلوچ راج ءِ سنچداریں ءُ زانشتی بنیاداں نزور کنگ ءِ بدل  ءَ مھکم کنگ ءَ اَنت نوں وتی پالسیانی سوبمند ءُ اسرمند کنگ ءَ بلوچ راجی روتاکانی سر ءَ ھم بندشش جنگ ءُ آھانی دارگ ءِ توجیل کنگءَ اِںت داں بلوچ راجی جھد ءِ تہ ءَ ایشانی ھما بائیواری اِنت آ ھلاس کنگ بہ بیت بلے انوگیں دور ءَ مالومداری ءِ دارگ ھچ واکداریں دژمن ءِ وس ءَ ڈن اِنت ۔ زورگریں واکانی ھمے ربیدگ بوتگ کہ اے رنگیں گامگیج ءُ زانشتی بنیاداں تاوان بہ دئے اَنت ءُ سنچداریں کاروان ءَ بہ دار اَنت  بلے  پابندی ءُ جبراکی ءَ زوگیرانی بدل ءَ چیردستیں راجانی سنچ ءِ ردوم گیش کرتگ ۔ چَہ ایشی ءَ پیش ھم بلوچ راجی ھالتاک ءَ بیھار دیگ بوتگ ۔پہ  ترس پیداک کنگ ءَ آئی ءِ کراچی ءِ کارگس ءِ دیم ءَ بیھار دئیں اسکیچ اَڈ کنگ بوتگ ۔ حب ءِ پجیگ ءَ سرجمیں بلوچستان ءَ توار ءِ بنڈل سوچگ بوتگ اَنت بلے اے توامیں زیادتیاں ابید ھم بلوچ راجی ھالتاک ءَ وتی اھوالکاری کار برجاہ داشتگ اَنت مروچی دژمن  بلوچ ھالتاک ءِ بند کنگ ءَ وتی لوٹانی پیلو بوگ زانگ ءَ اِنت ۔ آئی ءَ زانگ لوٹ اِیت کہ بلوچ مروچگیں نوبت ءِ مالومدار کنگ ءِ توامیں راہ ءُ آسراتیاں سوتمند بوگ ءَ اِنت بلکیں بلوچ راج وتی راجی لوٹانی پجیگ ءَ بدل بوتگیں جھانی جاوراں ھم سرپد کنائینگ ءَ اَنت بلے دنیا ءِ اھوالکارءُ رسانکدر ءَ ھمگرنچیں ، زانشت دوست ءُ انسانیت دوستاںی ذمہ واری اِنت آ اے رسانکدردژمنیں پالیسیانی ھلاپ ءَ گامگیج بہ زور اَنت ءُ وتی ذمہ واریاں پیلو بہ کن اَنت۔