ھرچے بوگ ءَ اِنت سبب مئے پالیسی اَنت ' ڈاکٹر مالک

شال : پاکستانی سینیٹر ءُ نیشنل پارٹی ءِ کماش ڈاکٹر عبدالمالک ءَ پاکستان ءِ گوں ھمساھگیں ملکاں ھمکاری وھد ءِ جوانتریں لوٹ نامینتگ ءُ گوشتگ کہ اگاں اسٹبلشمنٹ ءَ مروچی ھم  وتی جھادی پالیسی بدل نہ کرت اَنت گڑا جنجال گیشتر بنت ۔ پیپلز پارٹی بلوچستان ءِ جیڑہ ءَ گیشینگ ءُ اسٹبلشمنٹ ءَ چَہ وت ءَ زھر کنگ نہ لوٹ اِیت ۔ اے ھبر آئی ءَ چارشنبے ءِ روچ ءَ نیشنل پارٹی ء چیر دستیں نودربرگل  بی ایس او پجار ءِ گوستگیں سروک حلیم بلوچ ءِ نیشنل پارٹی ءِ تہ ءَ ھوار بوگ ءِ درگت ءَ بوتگیں پریس کانفرنس ءِ تہ ءَ گوشتگ اَنت ۔ آئی ءَ گوشتگ کہ مروچی ھرچے بوگ ءَ اِنت ایشی ءِ سبب مئے پالیسی اَنت گوں ھمساھگیں ملکاں آ رنگ  ءَ سیادی برجاہ دارگ نہ بوتگ اگاں مروچی جھادی پالیسی بدل کنگ نہ بوت اَنت نہ ایوک شال ناں بلکیں سرجمیں ملک ءِ جنجال گیش بنت پمیشکا ماسرپد بئے اِیں کہ ایران ءُ اوگانستان ءَ گوں سیادی ءُ ھمکاری گھتر کنگ بہ بنت ۔ آئی ءَ یک جستے ءِ پسو ءَ گوشتگ کہ انچوش کہ ملک ءِ دگہ شھراں امریکہ ءِ سفارتجاہ ھست اِنت ھمے پیم بلوچستان ءَ ھم جوڑ کنگ بہ بیت ۔آئی ءَ گوشتگ کہ ما بلوچستان ءَ یک تپاک ءُ راجی پارٹی یے دیگ لوٹ اِیں مئے گوں بی این پی گپ ءُ تران بوگ ءَ اِنت بلے بازیں گپ نہ گیش اِتگ اَنت ۔ پارٹی ءِ سروک خیرجان  ءِ سر ءَ اُرش ءُ حسن بلوچ ءِ کوش ایرجنگ کرزیں کارپد اَنت اے درگت ءَ راستیاں زوت رسانکدر ءِ دیم ءَ کار اِیں ۔ مولابخش دشتی ءُ نسیم جنگیان ءِ درگت ءَ ما پولیس ھال کرتگ کہ کئے ءُ پرچا مئے راھشون جتگ اَنت ۔آئی ءَ گوشتگ کہ بی ایل اے ءُ بی ایل ایف ءِ نیمگ ءَ مارا ھچ رنگیں بیھار نہ رستگ بلے یک گچینیں گروھے ھست کہ یکوی مئے جھد ءَ نشانگ کنگ ءَ اِنت کہ کس ھم ایشی ءَ اوپار نہ کنت ۔