کشمیر: پاکستانی جنگول عبداللہ یونی جنگ بوت

کشمیر : ھندوستانی کشمیر ءَ پولیس ءَ گوشتگ کہ  گوریچانی  کوچگ  سوپور ءَ دوشنبے ءِ روچ ءَ یک میڑے  ءَ پاکستانی دھشت گرد کمانڈر عبداللہ یونی چَہ مئے دست ءَ کشگ بوتگ ۔ پولیس ءَ گوشتگ کہ میڑ ءِ تہ ءَ یک پولیس کارندھے ھم ٹپی بوتگ ۔ پولیس اے کوش ءَ یک مزنیں سوبمندی ءِ زانگ ءَ اِنت ۔ آئی ءَ گوشتگ کہ  چَہ بازیں سال ءَ پولیس یونی ءَ شوھاز ءَ بوتگ۔ زانگ بہ بیت کہ گوستگیں سال ءَ نامداریں دینی عالم مولانا شوکت احمد شاہ ءِ کوش ءِ درگت ءَ پولیس ءَ ھما ھشتیں مردمانی سر ءَ کیس جتگ آھانی تہ ءَ عبداللہ یونی ھم ھوار بوتگ ۔آئی ءِ سر ءَ الزام بوتگ کہ آھاں بنچکی ملزم جاوید منشی کہ بل پاپا ءِ نام ءَ زانگ بیت تراکینوکیں مواد داتگ ۔ بلے لشکر ء طیبہ ءِ نیمگ ءَ شنگ کرتگیں یک پولے ءِ تہ ءَ گوشگ بوتگ کہ جاوید ءَ اے درگت ءَ عبداللہ ءَ ھال نہ داتگ کہ آ تراکینوکیں مواد ءَ پہ کئی کشگ ءَ کارمرد کنت ۔ پولیس ءَ گشتگ کہ مارا دوشنبے ءِ شپ ءَ  چاریگاں ھال داتگ کہ سوپور ءِ باگانی تہ ءَ بٹہ پور ءِ دمگ ءَ دھشت گرداں بندر کرتگ ما گوں فوج ءِ کمک ءَ میتگ انگیر کرتگ ۔ دوشنبے ءِ سھب ءَ چَہ عبدالاحد نائیکو ءِ لوگ ءِ دریگ ءَ پولیس ءُ فوج ءِ سر ءَ تیر گواری کنگ بوتگ بلے چَہ ایشی ءَ پولیس ءُ فوج ءِ ھچ مردم نہ مرتگ ءُ نہ ٹپی بوتگ۔ پولیس ءَ گوشتگ کہ عبدالاحد نائیکو ءِ چک مظفر نائیکو ھم چَہ گوستگیں ھپت سال ءَ گوں لشکر ء  طیبہ ءَ ھمگرنچ اِنت ءُ فورسز آئی ءَ شوھاز کنگ ءَ اَنت ۔