گوگل پلس نوں پہ درساںکارمرزی ءَ ساڑی اِنت

انٹر نیٹ کمپنی گوگل ءِ چاگردی رسانکاری ءِ تند جاہ "گوگل پلس"یک ماہ ءُ نیم ءِ چار تپاسی ءَ چہ رند نوں پہ مالوکات ءِ کارمرزی ءَ ساڑی اِنت۔ بنداتءَ گلوگل پلس تہنا پہ احوالکار ءُ ٹیکنالوجیءَ ھواریں مردمانی واستہ پچ کنگ بوتگ بلئے انٹرنیٹ کارمرز کنوکیں ایندگہ مردماناں دعوت دئیگ ءِ سوب ءَ ایشی ءِ کارمرز کنوکانی کساس زوت لکھانی تہا شمار بوت۔ تندجاہ ءِ بندات کنگ ءِ دو ہفتگ ءِ تہا گوگل ءَ جار جتگ کہ تند جاہ ءِ کارمرز کنوکانی کساس یک کروڑ ءَ سر بوتگ۔ اگاں کہ گوگل ءَ ایشی ءَ چہ رند تند جاہ ءِ کارمرز کنوکانی کساس ءِ بابت ءَ ہچ وڑیں جار نہ جتگ بلئے انٹر نیٹ ءَ تند جاہانی چار ءُ تپاسیں کمپنی "کومسکور"ءِ رد ءَ گوگل پلس ءِ کارمرز کنوکانی کساس اولی ماہ ءِ گڈسرءَدو کروڑ ءُ نیم ءَ اتک ءُ سر بوتگ۔ تند جاہ ءَ را ہمک مالوکات ءِکارمرزی ءِ واستہ ایشی ءِ تہا کمے گیشی آرگ بوھگءَ اِنت ۔ وھدے کہ گوگل پلس ءِ ویڈیوچیٹ ءِ ھوریءَایندگہ چیزاناں"فیچرز" باز ساڑاہگ بوہگ ءَ اِنت۔ گوگل پلس ءِ نامداریِ ءَ چہ فیس بک ءَ ام وتی تند جاہ ءِ تہا گیشی آرگ  بندات کتگ۔بلئے فیس بک ءِ گشگ اِنت کہ اے گیشیاں آ یک سالے پیش آرگ لوٹگءَ اِنتءُ ایشی ءَ چہ گوگل پلس ءَ ہچ وڑیں سیالی نیست۔ یاد بہ بیت کہ چاگردی رسانکاری ءِ تند جاہانی تہا گوگل یک نوکیں لئیبی ئِے۔ءُ ایشی ءَ را فیس بک ءُ ٹوئٹر ءِ پیمیں دژمنانی دیمی بوہگی اِنت۔انوں ٹوئٹر ءِ بیست کروڑ ءُ فیس بک ءِ ھپتاد ءُ پنچ کروڑ کارمرز کنو ک اَنت۔ گوگل ءِ چاگردی بزنس ءِ دومی پاگ واجہ" وِک گنڈوترا"ءَ بی بی سی ءَ تران کنان ءَ گشتگ کہ آ ایندگی تندجاہانی دیمپانی "مقابلہ" ءَ ساڑی اِنت۔