ھنکین چاگزار ھاشم ءُ بنزہ کارگشاد منیر ءِ سر ءَ اُرش لگوریں کارے ' بی ایس او آزاد

شال : بلوچ اسٹوڈنٹس آرگنائزیشن ءِ بنجاھی جارکش ءَ بی ایس او شال ھنکین ءِ آرگنائزر ءُ بنزہ کارگشاد ءِ سر ءَ اُرش یک لگور ءُ بے راھبندیں کارے نامینتگ ءُ گوشتگ کہ بلوچ ورناھاں چَہ زانشت ءِ راجی جھد ءَ  دزکش کنگ ءُ کسانیں گپانی سر ءَ گوں یک دومی ءَ دزگلاش کنگ ءِ  پندل سازگ بوگ ءَ اِنت ءُ پہ وتی گزراں راجی سیاست ءُ رواج ھم لگتمال کنگ بوگ ءَ اَنت پرچاکہ گوستگیں روچ ءَ  بی ایس او ءِ راھشونانی سر ءَ سراپ کنگ ءُ شوربندی ءَ گوں اُرش کنگ بوتگ چَہ اے اُرش ءَ ھاشم ءۃ منیر سک ٹپی بوتگ اَنت ۔اے کار ءَ پد باسک ، راجدوستیں کارکن ،  یونیورسٹی بندبست کار ءُ پروفیسراں ھم ھمدردی کرتگ پرچا کہ بلوچستان یونیورسٹی ءِ  تہ ءَ اُرش چوناھیا بی ایس او ءِ سر ءَ نہ اِنت بلکیں بلوچ راجی لیکو ءُ کارپد ءُ بلوچ گلزمین دوستی ءِ لیکو ءِ سر ءَ اُرش اِنت چَہ ایشی ءَ بلوچ ورناھاں نزور پیش دارگ ءِ یک بے سوبیں جھدے کنگ بوتگ ۔ یک گچینی ٹکے ءَ پہ وتی ذاتی لوٹ ءُ ٹکی ھیالاں مردمانی سر ءَ مشگ ءَ اے بے سوبیں کار کرتگ ۔ بی ایس او اے رنگیں کپتگیں کاراں نہ ترس  اِیت نہ راجی گزراں ذاتی لوٹانی دین ءَ دنت ۔ بلوچستان یونیورسٹی ءِ کہ پہ نودر براں نوگو ایریا ، ھاسٹل ءُ انٹری گیٹ ءَ سیکورٹی ءِ ترندگری بندبست ھست اَنت بلے پہ بی ایس او ءِ اُگدہ دارانی سر ءَ اُرش ءَ ڈنڈا ءُ سلاھانی بوگ ءَ ھمے زانگ بیت کہ پہ بلوچ ورناھانی کشگ ءَ  نا شر یلو دیگ بوتگ اَنت ۔ بلے ما جوانی ءَ سرپد اِیں کہ بلوچستان یونیورسٹی ءَ چکاسگریں تک [ شعبہ امتحانات ] چونیں کردگار سازگ ءَ اِنت کہ کرپشن ءُ سیاد دوستی ءِ بدتریں درور جوڑبوتگ ۔ بی ایس ا و ءَ حق ھست کہ بلوچستان یونیورسٹی ءِ تہ ءَ ڈنی دزمانجنی ءُ جانبداریں بندبست کارانی زانشت دژمنی ءَ پدر بہ کنت ۔ بی ایس او ءَ مدام اوپار کرتگ ءُ جیڑھانی سر ءَ دانشمندی ءَ گوں  شوربندی کرتگ ءُ زانشتی چاگرد ءِ تہ ءَ دزمانجنی برداشت نہ کرتگ بلے راھشونانی سر ءَ اُرش برداشت کنگ نہ بیت ۔ بلوچستان یونیورسٹی بندبست کار اے کارپد ءِ سبب ءُ پہ ایشانی دارگ ءَ ذمہ واراں دزگیر بہ کنائین اِیت ءُ آھانی ھلاپ ءَ تادیبی کارروائی بہ کنت ۔ بی ایس او اے ناروائیں روش ءِ ھلاپ ءَ 26داں 28ستمبر ءَ کلاسانی بائیکاٹ کنت ءُ پہ گیشتریں ترند گیریں شوربندی ءَ شورکنگ ءَ پد زھرشانی ءَ پراھوان کنت ۔